Тошматова Ситора Азизбек қизи шеърлари
Онамга мактуб
(Есенин оҳангида)
Салом, хат!
Ассалом, меҳрибонгинам!
Сизни, дадамларни соғиндим бирам.
Укам шўхлигини ташладими сал,
Яхши юрибдими ўжар сингилчам?
Мендан сўрасангиз, мен ҳам омонман,
Гоҳи гулгун, гоҳи ранги сомонман.
Аммо сўзларингиз чиқмас ёдимдан:
Мен фақат яхшилик, меҳр томонман…
Она, тунов куни кўрдим тушимда:
Дарахтларим шиғил мева солибди.
Аммо менинг айни гулгун чоғимда
Отам…отам буйи чўкиб қолибди…
Эҳ, мен нодон киз-а, эҳ, мен нодон қиз,
Мен деб гоҳи ҳайрон, гоҳи сарсонсиз.
Ҳеч йўқса қишлоққа нафи тегарди
Шоир қиз ўрнига чўпон туғсангиз…
Товонимни тилиб ташлади, она,
Бугун тош шаҳарнинг тошкўчалари.
Кўз олдимдан бир-бир ўтяпти, мана,
Қўшнининг қоп-қора болачалари.
Маҳаллада «бештош» ўйнаб ўтирган
Попук қизчаларни соғиндим жуда.
Бу ерда болалар тупроқ чангитмас,
Кўчага чиқишмас худа-беҳуда.
Она, сизга одат хар кун саҳарда
Тандирлаб-тандирлаб кулча нон ёпиш.
Менинг ишим эса сўздан сўз ясаб
Думбул шеърларимга қофия топиш…
Хатимга шу ерда қўяман нуқта,
Саломим етказинг қадрдонларга.
Ва айтинг: Зулфия, Нодира бўлмай
Қайтиб боролмайман у томонларга.
Она, гар дуолар бўлса ижобат,
Бир куни мен энг зўр шоир бўламан.
Ва дилларга кадаб ашъоргулларни,
Ватанни бағримга босиб ўламан!
Халқона
Маҳалламиз йўллари
Жуда тор-ей, жуда тор.
Кўчамдан ҳар кун ўтган
Шу йигитда кўнглим бор.
Бўйлари дароз-дароз,
Бўйларимга жуда мос.
Йигитчага тенглашар
Фақат мендек сарвиноз!
Безори, ёмон йигит,
Ғурури осмон йигит.
Асакаси кетарми
Боқса биз томон йигит?!
Сезаман, мени кўрса,
Дук-дук урар юраги.
Ўзи мени кўриш-чун
Ҳар кун ўтса кераг-ов!
Маҳалламиз йўллари,
Жуда тор-ей, жуда тор.
Биламан, шу йигитнинг
Менда аниқ кўнгли бор…
Чанг-тўзон, тор кўчалар,
Зўр ҳуштакзор кўчалар.
Ойнам тагида кимдир
Қушиқ айтар кечалар.
Ўша «кимдир» кимлигин
Билишимни билмайди.
Саҳаргача қўшиқ ҳам,
Ҳуштаклар ҳам тинмайди.
Кунлар ўтиб, вақт ўтиб,
Қилиб қолар дил изҳор.
Аҳдига содиқ қолса,
Ёри бўлай вафодор.
Маҳалламиз йўллари,
Жуда тор-ей, жуда тор.
Шу тор кўчада ҳали
Янграйди қўшиқ, ёр-ёр.
Ўзингни суйдирма бунчалар
Юрагим тинмайин куй чалар,
Хаёлим паришон кечалар,
Ахир мен деб сарсон нечалар,
Ўзингни суйдирма бунчалар.
Жонимга жазодир кўзларинг,
Дардимга даводир кўзларинг,
Ё қаро балодир кўзларинг,
Ўзингни суйдирма бунчалар.
Оғриниб-оғриниб севаман,
Соғиниб-соғиниб севаман,
Мен… сенга сиғиниб севаман…
Ўзингни суйдирма бунчалар.
Биламан, ўзгани суймайсан,
Биламан, мендан кўп ўйлайсан,
Биламан, ҳеч кимга бермайсан,
Ўзингни суйдирма бунчалар.
Қараб тур, ғурурчанг эгаман,
Бир мени ўйлайсан кечалар.
Бўлмаса жўрангга тегаман,
Ўзингни суйдирма бунчалар!
Замонавий шеър
Сизни соғинаман, кутаман,
Смслар ёзаман тинмай.
Овутаман ўзимни ўзим:
“Барибир келади, ўкинма”
Бошлаб яна араз-аразни,
Ўйиндан ўт чиқарган – ўзим.
Тағин дейман ўзимча мағрур:
“Ўзи сўраб келар кечирим!”
Қўнғироқлар қиламан – ўчиқ,
Ё дойрадан ташқаридасиз.
(Бекорларни айтибсиз, бегим,
Сиз қалбимнинг энг қаъридасиз!)
Барибир қайтасиз, биламан,
Қозиқни қоқаман маҳкамроқ.
Икки юз йил йўқ бўб кетмассиз,
Ахир эмассиз Одам Ато!
Сизни соғинаман, кутаман,
Қўнғироқлар қиламан тинмай.
Битта гапни қайтараверар
Диспетчер хоним ҳам эринмай.
Кўтарасиз гўшакни охир,
Телефон ҳам берар менга тан.
Дилга яқин овозда дейсиз:
“Кечир, жоним, ухлаб қолибман…”
4 fikr
Ситорахон, яхшимисиз? Уйдагилар, ойиз яхши юрибдиларми? Саломимни етказиб қўясиз. Жуда ажойиб шеър ёзибсиз. Айниқса, биринчиси Зулфия опанинг хақиқий эрка қизининг дил изҳоридек бўлибди. Юбилей муносабати билан эфирга узатилган кўрсатувда ҳам яхши гапларни гапириб, Опанинг шеърларини ҳам чиройли ўқиб бердингиз. Ижодингизга улкан муваффақиятлар. Олийгоҳдаги таҳсил чарчатмаётибдими? Яна турли тадбирлар, учрашувлар? Шеърингизда Зулфия, Нодира бўлмагунча бормийман деган бўлсангиз ҳам, биламан Бекободга бориб турибсиз. Борганда Зафардаги мени танийдиган барча қадрдонларга салом айтасиз. Қуйи Чирчиқлик Кумуш Абдусаломова борку, яқинда Ижод фонди томонидан “Куйламасам бўлмайди” номли китоби чоп этилган. Шу қиз менинг жияним бўлади. Бу йил Университетга топширди, насиб қилса, имтиҳонлардан муваффақиятли ўтса, талабалик гаштини бирга суриб, унга қўлдан келгунча ёрдам, маслаҳат бериб, Опалик қилиб юрарсиз. Ситорахон юртимизда ижодкор ёшлар, айниқса қалам тебратадиганлари жуда ҳам кўп, лекин Сизлар уларнинг ичида энг омадлиси, бахтлисисизлар десам асло адашмайман. Муҳтарам Юртбошимизнинг юксак эътирофига, эътибор ва Оталарча меҳр-муҳаббатига сазовор бўлганликларингизни доимо эсда тутиш, бу улкан масъулиятни доимо оқлаб юриш муҳим масала. Сиз каби Зулфияхоним қизлари, бу юксак давлат мукофот соҳибалари вилоятимиз, бутун юртимиз ёшларининг фахру-ифтихори саналасизлар. Катта шоирлар, устозлар Махмуд Тоир, Иқбол Мирзо, Сирожиддин Саййид, Фарида Афрўз ва Мунавварахонимларнинг суҳбатида кўпроқ бўлишга ҳаракат қилинглар. Ижодкор эмасманку, лекин ўйлашимча Сизларнинг шеърларингиз мактабда, ўсмирлик пайтидаги илк севги деймизми, ўткинчи туйғуларми, хуллас шу туйғулар таъсирида шеър битадиган кўплаб ҳаваскорлар, ўз дунёсида янги пайдо бўлаётган шеърият “юлдузлари” ёки “даҳолари”никидан тубдан фарқланиши, ажралиб туриши керак. Албатта, шеърларингиз ҳозир айнан шундай савияда бўлгани учун ҳурматли устозларнинг эътирофига сазовор бўлиб юрибсизлар. Лекин бу ишонч ва даражани доимо сақлаб қолиш лозим. Шу йўлда мен сизга улкан муваффақиятлар, ижодий ютуқ ва янги зафарлар тилайман. Соғ бўлинг. Азамат Камолов (Камолот)
Assalomu alaykum, Azamat aka! Ishlaringiz yaxshimi? Sizni anchadan beri topolmay qoldikku.))) Samimiy fikrlaringizni o’qib juda xursand bo’ldik. Rahmat kattakon.
Sitoraning “Onamga maktub” she`rini o`qidim juda samimiy hayotiy gaplar ammo, kimning dir she`riga oxshash manimcha Muhammad Yusufni oxirgi jumlalari “O`shni quchib o`lsam” degan so`zlariga oxshash. Ne bo`lganda ham omad.
Dilga yaqin she`r doim yaxshi chiqadi.
Samimiy fikrlar uchun tashakkur, hurmatli Muxlis! Aslida, barcha shoirlarni bir narsa birlashtirib turadi – ko’ngil. Shu sabablidir, yoki ustozlarga havas natijasimi, bir-biriga o’xshash she’rlarni adabiyotda ko’plab uchratish mumkin. Sizdek ziyrak muxlislar bizga juda kerak, sababi adabiyot faqat maqtov-u balandparvoz gaplardan emas, to’g’ri yo’naltiruvchi tanqidlardan ham iborat bo’lishi zarur.